中環出更：譚志源未卸任已被游說參選人大
全國人大代表將於年底舉行換屆選舉，早前有傳政制及內地事務局前局長譚志源（Raymond）有意參選，佢尋日出席活動時自爆原本無意參選，但喺今年五至六月，即尚未卸任時，有現任港區全國人大同政黨領袖游說，認為佢唔參選會否浪費過去多年喺特區政府與內地嘅聯繫，所以改變諗法。
與梁錦松14年後再「合體」
Raymond承認積極考慮十二月參選，而過去個多星期，佢已經接觸唔少有份投票嘅人士，獲得正面回應和支持，佢估計自己可以「勉強入到圍」。佢話自己若參選人大，相信可以做到橋樑角色，協助國家發展。
早前Raymond因同現屆政府「步伐不同」而退下火線，前日就宣布佢獲前財政司司長梁錦松有份投資嘅新風天域集團聘任為醫療副主席，以及新風天域教育主席。梁錦松在任時，Raymond係其新聞秘書，估唔到佢哋分開十四年再次合體。Raymond就指自己考慮工作時「好揀擇」，希望搵到嘅新工作要有意義，唔係純為賺錢或被形容係「下海」。
卓妮