香港景點單調，來來去去唔係金紫荊廣場就係主題公園，好不容易有中環海濱摩天輪呢個新地標，近年成為唔少市民同遊客打卡嘅熱點，點知依家又因為新舊營辦商傾唔掂數，加上官老爺闊佬懶理，重開遙遙無期，真係唔得佢死。
話說中環海濱摩天輪上個星期失驚無神停開，搞到唔少遊客摸門釘，鬼咁掃興，原來係營辦商合約八月底屆滿，不獲續約，據聞佢哋同下一手商討摩天輪接手事宜，一旦傾唔埋欄，舊營辦商就要喺下個月底前進行拆卸「交吉」。事件尋日有新進展，有海濱事務委員會成員踢爆，原來舊摩天輪營辦商早喺五月已經知道投標失敗，但直至最後一刻仍然秘而不宣，批評咁做係想用公眾壓力做談判籌碼。
即係咁，商業談判邊個着邊個唔着，外人好難講得埋，但港府一樣為舊營辦商「保密」，咁就好離奇嘞。家陣最大嘅問題係，摩天輪又拆又起，究竟要搞到幾時冇人知，但中環海濱靚地就肯定淪為沙塵滾滾嘅工地，唔單止影響香港形象，旅客同市民冇咗個消閒去處，仲未計當中造成嘅浪費，你話呢隻鑊邊個孭先？
不可不知，中環海濱係官地，同私人物業始終唔同，如何保證善用涉及公眾利益，官老爺冇可能置身事外，可惜事實啱啱相反，商務及經濟發展局局長邱騰華一味大打官腔，強調當局一直有跟進新舊營辦商嘅交接工作，希望佢哋以大局及整體效益出發，減少對遊客及市民嘅影響，講到好似完全唔關自己事咁。
難為官老爺仲好意思講「大局為重」，搞成今日咁嘅爛攤子，正正係佢哋當初做漏招種嘅禍。中環海濱用地一向備受關注，港府以短期合約形式批出，營辦商三年就要離場，欠缺長期規劃，本身已經好唔理想。再講吖，如果當年標書一早規定日後經營權改變，相關硬件設施係咪保留，相信今日就唔會出現咁多爭拗。
講開又講，呢單嘢仲有好多疑團有待澄清。例如原有營辦商做得好哋哋，當局點解突然重新招標？選擇新營辦商又有乜準則？當然喇，港產官僚可以大條道理，話重新招標合乎公平、透明原則，可以做到地盡其利，但如此一來問題又嚟嘞，家陣大把官地閒置，賤價租出作權貴私人會所有之，做富豪高爾夫球場有之，被霸佔作廢車場有之，又唔見官老爺咁緊張，收番嚟「重新招標」？
政府一方面身為全港最大地主，一方面唔識好好利用土地，冇規冇矩，中環海濱摩天輪淪為一筆糊塗帳，咪就係一個縮影囉。