政情：黎穎瑜撐每日熄手機一粒鐘

食飯時多啲同人傾偈

Jade早前參與一個手機熄機一小時嘅活動，指近年唔少人機不離手，就算同枱食飯都只係顧住「篤芒」，如果每日熄機一粒鐘，例如午飯時間，咁食飯嗰陣可以專心同家人、朋友或同事傾偈，相信有助改善人際關係。

佢仲自爆喺沖涼期間或者同親朋好友見面嗰陣，將手機調校到震動模式，暫時逃離手機嘅魔掌。佢又話只敢校震機而唔熄機，係因為萬一有急事，幾個追魂call足夠震醒佢；就算事後先見到，都可以知道有乜嘢人搵過佢幾多次，迅速掌握情況。

早年擔任大專講師嘅佢又透露，試過約咗同學一齊去唱卡拉OK，佢擔心自己「老餅」唔識潮流新歌，決定事前自己一個去K房，專點新歌嚟聽同試唱，但係當佢萬事俱備去應約，先發現原來同學仔都只係唱舊歌，令佢感到浪費咗一番心血。