政情：闊別十年重返科大 陳家強嘆乜都變晒
上月初已重返科技大學商學院做兼任教授嘅財經事務及庫務局前局長陳家強，日前就遠赴上海出席科大EMBA嘅華東迎新晚宴，但活動完結之後，佢就慨嘆自己離開咗科大十年，估唔到大學已經有好大改變，到底係乜嘢事令佢咁感慨呢？
好多校友去咗內地工作
喺○七年離開大學加入政府熱廚房，十年後又重返科大。陳家強日前喺社交網站Facebook上載咗幾張相片交代出訪上海，仲話自己離開科大十年，唔知道科大已有逾七千校友喺內地工作，淨係EMBA嘅校友就已有七百人，當中唔少係企業家、投資人同創業者。難怪佢慨嘆自己昔日經常將「今天你們以科大為榮，將來科大以你們為榮」掛喺嘴邊，今日發現自己真係冇講錯啦。
陳家強此行仲出席咗由上海市推進國際金融中心建設領導小組舉辦嘅國際諮詢委員會會議，喺會上更獲當地派發聘書，聘請佢擔任委員會嘅委員添！