政情：「傘兵」黎梓恩搞太多旅行團惹「誤會」
「蛇齋餅糉」同埋搞街坊旅行團一向係建制派政黨拉攏選民嘅手法，「傘兵」出身嘅沙田區議員黎梓恩上任就嚟兩年，佢都好鍾意搞旅行團，仲自爆早排被街坊誤認佢係建制派嘅成員添！
畀街坊認錯做建制派
作為全職獨立區議員嘅黎梓恩，成日都落區服務街坊，照計應該唔會畀人認錯。不過有次落區就有一位街坊搞錯，誤以為佢係建制派嘅人。點解會係建制派？咪因為佢成日搞街坊旅行團囉！佢話上任以來搞咗好多次旅行團，不過去親都係東南亞。有街坊同佢反映話想去亞洲以外嘅地方，所以佢諗緊下年衝出亞洲，去吓俄羅斯喎。
除咗議會工作，黎梓恩嚟緊仲打算讀書，佢話對法律同社工有興趣，希望讀完會有專業資格。佢打算讀英國法律專業共同試課程，仲講笑話立法會議員梁美芬同周浩鼎都讀過呢個課程，話「佢哋都讀到，冇理由我讀唔到o架？」