政情：譚志源傳選人大 弊在得罪建制派
政府尋日公布政制及內地事務局前局長譚志源，十月一日喺新風天域集團擔任醫療副主席、新風天域教育主席，呢個集團係由前財政司司長梁錦松創立，梁錦松在任時，譚志源係佢嘅新聞秘書，今次又再重聚嘞！除咗新工之外，最近亦傳出譚志源考慮參選港區全國人大代表，但建制派就傳來反對聲音，話以佢過往嘅表現同態度，真係好難支持佢，更笑指佢可能選唔到，但就試到有幾多人唔鍾意佢喎。
港區全國人大代表將於年底舉行換屆選舉，由於選舉係以全票制度，需要互相支持先能夠當選，有意參選者呢個時候都開始放風同拉票，希望爭取各界支持，最近就傳出譚志源正考慮係咪參選。
被指走精面冇乜承擔
有建制中人指出，譚志源喺建制陣營中得到嘅評價係非常一般，認為佢雖然聰明，但係就「走精面」，冇乜承擔，例如佢喺政改嘅時候，經常唔出面撐政改方案，推晒畀其他人，令人質疑佢係唔想自己得罪泛民，於是就經常匿埋。
另外，佢喺選民登記方面，亦都得罪咗唔少建制派。一五年嘅選民登記，有四萬幾個選民因為冇覆信被撤銷投票資格，原來影響唔少建制派嘅選票，最終輸少於二百票嘅人士，都認為同選民登記有關，佢哋收到唔少選民投訴指被處方取消資格，但明明冇更改住址，甚至有部分資深建制派參選人，明明住喺自己嘅地址好多年，都收到選舉事務處嘅信件，幾乎因為冇回覆而失去選舉資格，呢一批建制派人士心中有氣，自然難以支持譚志源。
擔任局長時鮮約見人大
亦有指譚志源對港區全國人大嘅態度唔好，喺佢擔任局長期間，鮮有約見人大，根本就唔重視人大，但依家冇做局長，又話出嚟選人大，相信難以得到支持。建制派指出，除非北京全力支持譚志源就冇辦法，否則難以投票畀佢，即使希望一個前官員做人大，建制圈子內，寧願支持保安局前局長李少光再選一屆，事關李少光人緣好，擔任人大以來，亦經常到內地講解跨境事務。咁樣睇落，譚志源要選得上做人大，睇怕都好難啦！