中環出更：名媛搞畫展 搵狗狗做model
唔少城中名人都會有一兩項特長或興趣傍身，好似名媛謝玲玲就一直醉心繪畫藝術。早前佢仲喺香港舉辦首次個人作品展，當中有唔少係風景畫，但零零舍舍有兩幅係描繪小狗嘅作品，佢個女林顥伊就透露係佢叫媽咪試吓畫一啲細幅嘅畫，題材亦可以轉吓，所以就搵咗屋企嘅狗狗做model喇！
今次謝玲玲舉辦嘅「蕙質蘭心」油畫作品展，展出三十幅近年佢創作嘅油畫作品，並將其收益淨額捐贈畀香港單親協會同台灣優質生命協會，支持弱勢單親家庭、獨居高齡長者同埋身心障礙孩童。
囡囡獻計 畫細幅好賣啲
媽咪咁有善心，女兒林顥伊就梗係想佢賣多啲畫啦，不過啲畫咁大幅唔係人人都會買嚟擺喺屋企，所以阿女就建議媽咪畫啲細幅啲嘅，順便轉吓題材，除咗風景都畫吓動物。咁媽咪有冇搵佢同阿妹做model照住畫？佢即笑笑口話畀張相媽咪睇就算，一畫最少都要畫十幾個鐘，要佢坐定定咪搞！
當日有唔少名人嚟撐場，包括菁英會主席莊家彬媽媽莊賀碧諭同埋香港單親協會名譽顧問梁寶珠與女兒林玉茵。見莊賀碧諭對啲畫好有研究，原來佢都鍾意欣賞同收藏吓畫作，尤其鍾意一啲顏色同意境比較豐富嘅，而佢平日着衫打扮都幾有藝術觸角同美感，唔知係咪學過畫畫？佢就笑言冇，話畫畫好難，又要擺好多時間心機，佢曾經學過書法，但老師成日要佢交功課，佢冇咁多時間就放棄咗喇，所以都好佩服畫畫嘅人。
卓妮