數碼廣播終摺埋 好大喜功必累事

呢嗱，數碼廣播推出至今六年多，高峰時期有成十八條頻道，係威係勢咁，但大家不妨問吓身邊親朋好友，除咗知道前名嘴間公司有份經營，相信冇邊幾個真係有聽過啲節目。隨着舊年三間商營數碼廣播相繼將牌照發還畀港府，得番港台幾個頻道苟延，收工大吉只係時間問題啫。

講開數碼廣播「死因」，不得不提前特首曾蔭權爵士好大喜功不切實際。數碼聲音廣播呢家嘢，外國興咗好耐，到千禧年後更加喺全球遍地開花，等到港府十年後發牌時，人哋新加坡已經玩到唔玩，曾爵士後知後覺，貽誤先機，數碼廣播未開波已經衰咗一半。

數碼廣播先天已經不足，後天失調更加死多幾錢重。淨係要花幾舊水買架專屬收音機先至收聽到，嗰度已經夠趕客。喂，家陣資訊爆炸年代，手機上網大把節目等住你下載，仲邊有人咁神心「哺」住架收音機o架。最離譜嘅係，當局遲遲唔肯修例，容許車主合法安裝配備視像顯示器嘅數碼廣播收音機，數碼廣播電台變相流失大批搵食車司機客戶，咁搞法有運行至奇。

大家有眼見，港府無喇喇整撻瘌搞數碼廣播，之後就拍拍籮柚關人個關，結果投資者損手爛腳，公帑亦打咗水漂；至於曾爵士本人，當初興高采烈敲鑼打鼓，結果政績就冇嘞，自己反而因為發牌問題搞到一褲都係，你話歷史係幾咁諷刺呢。

話時話，數碼廣播連私營機構都做唔住，交畀港台搞更加嘥氣。港台每年預算開支接近十億元，但電視頻道大多數節目收視長期只有○點一點至○點二點，每日平均更有長達九小時係零，仲衰過熄機前嘅亞視。講開亞視，港台部分電視頻道連畫面都冇，淨係配張相加埋大抽文字，仲悶過《魚樂無窮》，連林鄭都恥笑，試問仲有咩存在價值。

拍烏蠅嘥米飯都算嘞，港台端起碗來吃肉，放下筷子罵娘先至最惡頂。好似《頭條新聞》同《城市論壇》呢挺節目，唔係攻擊政府譁眾取寵，就係淪為反對派政客免費宣傳場地。特別係後者，早排辯論題目居然夠膽死出現「一國兩制呃足廿年」字眼，事後接獲大量投訴，結果咪又係當耳邊風。

所以話啫，港府應該趁住數碼廣播壽終正寢呢個契機，認真檢討港台仲有冇繼續存在嘅必要，否則分分鐘「養狼狗，咬心口」，自己攞嚟衰嘅咋！