中環出更：陳凱欣做高永文「無糧經理人」
離任問責班子去向一直為人關注，而食物及衞生局前政治助理陳凱欣，未來會繼續做食衞局前局長高永文嘅「無糧經理人」，即係做義工，幫高永文做聯絡人，因為高永文仲有好多公開活動，亦有好多議員聯絡佢，所以佢就繼續幫吓手，至於轉為私人執業嘅高永文，佢間診所上星期已正式開診，但就冇大搞，因為怕招呼不周，所以都比較低調。離開咗政府都繼續幫手，睇嚟佢同高永文嘅感情好好喎。
月中出任「好聲」行政總裁
其實陳凱欣都唔止做義工嘅，佢透露，自己啱啱接獲政府通知，批准佢九月中履新出任「好聲服務公司」行政總裁，「好聲」係一間社企及慈善機構，繼承已故音樂人黃霑嘅遺願，推出中國名著、粵曲戲寶等有聲書，唔少藝員都有份「出聲」。
陳凱欣話轉咗工後，都多咗時間陪小朋友，而且呢間公司畀到佢好大自由度，又可以幫到人，所以都好期待返新工喎。佢仲話上任後會邀請政商界人士擔任好聲顧問，希望更大力推動「發聲書」，令更多長者、病人、弱勢社群等受惠，發揚黃霑嘅遺願。
卓妮