中環出更：盂蘭節議員「搶孤」不成去試食
一班議員尋日興致勃勃咁參加搶孤競賽，但天公不作美，落傾盆大雨，搞到冠軍隊同立法會議員隊嘅友誼賽被迫取消，但係八位立法會議員嘅士氣都無減到，仲拎住「孤承」影相，好有氣勢咁大嗌「今日冇人輸」！
香港潮屬總會舉辦嘅「盂蘭文化節」踏入第三年，喺八個議員當中只有旅遊界姚思榮同漁農界何俊賢（高佬賢）參加過第一年嘅搶孤競賽，身為潮州人嘅柯創盛（柯仔），知道比賽取消後就同卓妮大呻好失望，佢解釋，話自己讀緊小學時有次返鄉下就同啲親戚一齊玩搶孤，自此就冇再玩過，難得今次撞啱時間但冇得玩。高佬賢就建議應該搞番隊立法會搶孤隊，因為可以有多啲議員同埋佢哋家人參與之餘，仲可以訓練到合作精神。如果真係搞得成，相信柯仔就唔使再失望啦！
何俊賢笑言竹殼茶係「熱涼粉」
玩唔成搶孤，一班議員就轉戰試食，佢哋試咗竹殼茶，金融界陳振英話飲落甘甘地，高佬賢仲講笑話係「熱嘅液態涼粉」添！其實竹殼茶係來自紫金縣，可以清熱消暑、利濕消滯，屬民間涼茶嘅一種。
講到潮州美食，柯仔自爆話次次返潮州食完滷水鵝，都忍唔住會帶番隻滷水鵝返港，而上次去潮州做完嘢之後都帶咗隻返嚟，最終只留咗四分一畀自己，其他就分晒畀義工同朋友，佢話潮州啲滷水鵝嘅香料同香港好唔同，相比之下潮州嘅正好多喎。同樣係潮州人嘅陳恒鑌（Ben）就話早排帶埋囡囡返鄉下玩，囡囡好鍾意食當地嘅河粉，話比香港嘅更有嚼口。阿Ben仲帶咗太太去飲佢至愛嘅蓮藕湯，係用豬骨、豬雜同蓮藕煲成，就連唔係潮州人嘅太太都大讚好味添！
卓妮