「出得嚟行，預咗要還」呢句電影金句最近頻頻被引用，好似「雙學三子」被法庭改判入獄，雖然心不甘情不願，但總算叫做為自己所作所為付出代價，咁作為罪魁禍首嘅佔中搞手戴耀廷，條爛數又幾時至肯還呢？
係人都知，人稱「戴妖」嘅戴耀廷唔止係「佔中三丑」嘅帶頭人，仲藉住港大教職之便散播「違法達義」歪論，「毀」人不倦，誤人子弟，年輕人淪為政治炮灰，唔係坐監就係潛逃，真係多得佢唔少。是可忍孰不可忍，立法會議員何君堯前日發起網上聯署要求港大炒咗呢位魔鬼老師，截至尋晚已有近三萬人響應，咩叫民意滔滔，咩叫眾怒難犯，大家睇到喇。
即係咁，網上聯署呢一招反對派最鍾意用，家陣都算係以其人之道還治其人之身咯。咁當然，輸打贏要不嬲係反對派嘅作風，預料佢哋又會話網上簽名非實名制，總之龍門任搬，有佢講冇人講，從來唔知醜字點寫。所以話啫，反對派講乜唔重要，數字先至最實際，近三萬個簽名代表近三萬個民意聲音，冇花冇假，唔到港大唔正視o架。
可惜吖，港大校長馬斐森就快執包袱走人，擺明拍拍屁股話之你。呢，尋日港大舉行新生入學禮，洋校長係就係話正在服刑嘅校友周永康要為自己做過嘅事負責，但講到戴耀廷咯喎，即刻顧左右而言他，話至今收過幾封要求革職嘅信，遲啲會約見事件主角，但強調唔係傾炒魷魚嘅事喎。咁即係點呢？咪即係繼續縱容包庇囉，即係小罵大幫忙囉。
其實都冇乜出奇，港大不嬲係佔中大本營，戴耀廷仲好似有免死金牌咁款，之前被踢爆匿名捐黑金一樣過到骨，擺明有保護傘。咪話唔提醒，洋校長雖然就快收工，之但係港大喺佢任內排名一落千丈，年輕人仲慘被洗腦，現任學生會會長黃政鍀甚至連開學禮都唔放過宣揚政治歪理嘅機會，話坐緊監嘅周永康同等入獄嘅梁天琦好值得學習喎，問你點頂。洋校長唔去撥亂反正，反而任由年輕人誤入歧途，點都唔係一校之長應有之義，唔通佢老哥唔驚成為港大罪人，遺臭萬年咩？
避得過初一，避唔過十五。想當日，戴妖沾沾自喜話佔中係「政治核彈」，圖謀奪權變天，點知炸唔到中央，反而炸爛香港，炸殘一代年輕人，莫講話大學應該將佢掃地出門，港府更要將佢繩之以法。隨着司法大網愈收愈緊，將戴妖、漢奸黎一眾佔中黑手落鑊既有法律依據，亦係民心所向，如果港府係都要投鼠忌器，畏首畏尾，咁就唔好自詡好打得嘞，自認「為官避事平生恥」好過喇。