政情：重遊英國 容永祺心情大不同
香港專業及資深行政人員協會創會會長容永祺（Samuel）早前同家人去完英國旅行，仲搵番十幾年前送阿仔去英國讀書時張相，今次重返同一個地方再影合照，但無論佢同阿仔嘅表情，定係相中餐廳嘅裝修都同以前大不同，相當有趣。
Samuel話記得當年第一次送阿仔去英國讀書，一落機就去咗唐人街食早餐，嗰陣朝早六、七點，開門嘅餐廳得一間，佢哋入去飲咗杯奶茶食個早餐後，喺餐廳門口影咗張相留念，不過當時佢心裏面唔捨得個仔之餘，亦有少少擔心。今次舊地重遊就完全唔同晒喇！阿仔畢咗業咁耐，兩人笑笑口心情相當輕鬆，而餐廳亦重新裝修過，煥然一新。
對安迪沃荷作品一見鍾情
今次英國之行另一驚喜之處，係佢見到安迪沃荷其中一系列作品時覺得一見鍾情，望真啲原來係取材自佢之前喺意大利見到嘅達文西作品，佢當時喺意大利仲鍾意到拍咗條短片，難怪感覺會咁熟悉！講起上次去意大利，佢話嗰次一班同事喺當地著名餐廳食得好開心，而佢喺比薩斜塔前草地影相時亦冇被阻擋，拍出嚟嘅相好滿意，非常幸運。