政情：政府冇人用 黃遠輝王坤覓地頂硬上
港府成立大批諮詢委員會，原意係吸納社會各界嘅意見，不過近年因人才匱乏，冇乜新面孔。政府最新前日成立「土地供應專責小組」（專責小組）檢視土地供應來源，亦面對同一難題，出任專責小組主席係外號「公職王」嘅銀行家黃遠輝（Stanley），之不過連同最新呢個公職，Stanley已孭住七項公職，似乎打破咗一人不可同時出任超過六項公職嘅不成文規定；另一方面，已榮休弄孫為樂嘅公屋聯會前主席王坤，退休不足半年又要出山，莫非政界中人研判覓地起屋，地從何來嘅問題太惹火，有得揀都唔想接呢個火把？
政府於委任公職時有不成文嘅「六六規定」，即每人不可同時出任超過六項公職，或出任某公職超過六年嘅規定。不過，近年呢項不成文規定被指已名存實亡，包括某啲委員會或小組原來唔計算為一項公職，因此何謂打破「六六規定」，多咗一啲灰色地帶，有人講笑話有冇違反「六六規定」，查實係官方說了算。
孭七公職 黃：無打破「六六規定」
最新一個疑似打破「六六規定」，就係前日獲委任為專責小組主席嘅Stanley。資料顯示，未計最新委任，Stanley本身最少有六項公職，包括房屋委員會資助房屋小組委員會主席、市建局非執行董事；涉及環保方面，則有環境諮詢委員會主席、能源諮詢委員會委員；另外兩項係博物館諮詢委員會主席，同埋離職公務員就業申請諮詢委員會委員。
對於被指現時孭住七項公職，Stanley接受查詢時話，專責小組唔計算在「六六規定」嘅界限內，所以唔需要退出其他公職喎。Stanley嘅講法，令外界對於計算公職嘅數目增加唔少想像空間，認真耐人尋味。
退休唔夠半年 王坤入專責小組
除咗Stanley等「公職王」嘅公職愈加愈多，在人才庫選擇有限下，連已退休嘅亦獲當局「重新徵召」，所指嘅係今年三月正式喺公屋聯會交棒，擔任主席超過二十年嘅王坤，佢今次亦喺專責小組名單之上。
據了解，今次係由發展局邀請王坤加入，已卸下所有銜頭嘅王坤原本拒絕，反而建議新一屆公屋聯會領導層派人加入，但經過一輪商討後，據聞王坤考慮到倘若自己拒絕加入呢個專責小組，政府隨時會喺其他團體搵人加入，因此最終決定出山幫手。王坤接受查詢時否認「退而不休」，重申加入專責小組係希望代表公屋基層發聲，無其他考慮因素。