中環出更：黃之鋒抗爭路 始於學校飯堂
香港眾志秘書長黃之鋒早前因為衝擊政府總部東翼前地而被上訴庭加刑，被判即時入獄六個月。黃之鋒嘅爸爸、性傾向條例家校關注組召集人黃偉明尋日接受電台訪問，憶述黃之鋒首次關注公共事務，係喺社交網站專頁抗議中學飯堂「太難食」，最後要見校長，又話喺黃之鋒開始參與社運時，自己已提醒佢唔可以用暴力手法達到目的，認為黃之鋒抗爭個陣一直保持和平同埋非暴力。
黃父話囝囝性格似自己
黃偉明話近日曾經探望黃之鋒，仲帶咗本聖經畀個仔。佢憶述，黃之鋒首次抗議學校飯堂難食時，自己亦感到個仔堅持原則，形容阿仔嘅性格同自己有啲相似，喺大是大非面前不易妥協。
佢又認為黃之鋒「好乖」，喺抗爭時保持和平同非暴力，「如果你話個『奪』字都係暴力，我冇嘢好講」，佢質疑法官有政治動機，唔係專業法官應有嘅表現，又批評現時檢控制度下，政治任命嘅律政司能夠凌駕一切，認為應要改善制度。
卓妮