中環出更：楊大偉樂見街頭素食
講起食素仲諗起齋舖啲齋？依家香港愈嚟愈多人食素，哪怕係一星期一次定一個月一次都好，都想食得健康啲。卓妮早前見到社企Green Monday聯合創辦人楊大偉（David），佢就話依家食素已經發展到好多元化，除咗素漢堡、素海南雞飯，仲連街頭風味十足嘅魚蛋同煎釀三寶都有素嘅！以後素食者可以大飽口福喇！
David話想將食素變成一種長期習慣，啱啱開始嗰陣唔可以太過單調只狂食生菜豆腐，咁樣好難持之以恒，其實素食一樣可以好多款式「好型」，佢哋不斷諗好多新菜式，好似用豆漿做湯底嘅豆乳家常麵同麻辣口水雞咁，吸引大家堅持食素。佢仲透露自從旺角店開咗之後因量產成本低咗，決定將降低咗嘅成本以減價形式回饋食客。
王利民用茄子煮素盤龍鱔
康宏集團主席王利民都在場，原來佢煮素食有一手，用冬瓜代替豬肉整梅菜扣肉，又用茄子炮製「盤龍鱔」，極有諗頭同新意。佢仲笑言有次跑極地馬拉松輸咗畀食全素嘅Green Monday創辦人魏華星，話覺得食素耐力真係好啲，自己就輸在有時忍唔住食吓肉囉！
轉頭見到理文化工執行董事李文恩同太太Lorinda。經常返內地做生意嘅李文恩話應酬往往會叫過多嘢食，佢唔想浪費所以通常都會盡量食，因此平日亦會食素抵銷番。Green Monday執行委員會委員趙家樂平日照顧同收養唔少流浪貓狗，對得動物多自然亦唔捨得食動物，佢仲會煮素畀屋企嘅狗狗食，依家隻狗十四歲，仲健康同長命過以前食普通狗糧嗰隻喎。
卓妮