政情：從政冇財運羅致光唔呻笨
勞工及福利局局長羅致光（CK）早前曾經自爆，為咗做局長，早喺今年六月底前賣晒手上近廿隻股票，點知股市繼續升，佢賺少嘅金額等同半年局長人工，即係超過二百萬港元。其實CK因為從政而賺少咗錢都唔係第一次，佢當年做立法會議員八年，埋單計數竟然倒蝕約一百萬元，以當時嘅樓價計算，已經可以買到一個單位喇。
做立法會議員8年 倒貼100萬
CK喺回歸前後曾經擔任立法會社福界議員，嗰陣係民主黨（白鴿黨）成員。佢話當年同時喺大學教書，大部分人工都上繳咗，三成上繳畀白鴿黨，四成就上繳咗畀大學，一成半就要交稅，剩番嘅錢再扣除選舉開支等等，其實咁多年議員人工加埋都唔夠，結果倒貼咗約一百萬元。
做議員人工要上繳畀大學，真係好少聽見，乜大學有呢啲制度咩？CK話，其實大學冇呢個規定，不過自己當時又教書又做議員，唔想畀人講，所以當選後就主動同學校講，自願上繳啲錢畀部門自己決定點樣調動資源，所以都冇用自己個名成立獎學金等。CK話冇後悔要貼錢做議員，覺得自己都係做值得做嘅事。
不過咁，今次CK為咗做局長沽清手上股票，由六月底至今，恒生指數又升多二千幾點，睇嚟CK又點止賺少二百萬吖！
為常出席建制派議辦開幕解畫
做咗咁多年議員，依家轉換身份做官員，CK對議員都幾友善，逢親議員有辦事處開幕，佢多數都畀面出席，不過似乎係出席建制派辦事處開幕嘅比率較高。CK就解釋，其實佢唔係唔去泛民議員辦事處開幕，而係泛民嘅辦事處可能喺任期開始嘅時候已經開咗，加上冇建制派咁多資源，新嘅辦事處數目唔多，所以大家先至有錯覺啫。
咁到底做邊份工要花多啲時間呢？CK就話，自己做議員時瞓得多過做官員，事關做議員可以喺辯論嗰陣瞓吓。咁講法，唔通投訴做官太忙唔夠瞓？佢就即刻兜番話，做局長都瞓得夠嘅。