中環出更：升呢做副局 陳百里常「溫書」防甩轆
商務及經濟發展局副局長陳百里上屆加入政府，五年時間就由政治助理升呢做副局長，仕途都算唔錯。雖然佢相對新上任嘅商經局局長邱騰華，以及下個月先正式返工嘅政助馮海容，喺商經局嘅資歷算係深啲，但佢坦言唔敢放鬆，笑稱「唔熟書就大鑊」。
話唔係怕步徐英偉後塵
早前民建聯黨友兼勞工及福利局副局長徐英偉答唔出最低工資等基本常識，被外界嘲笑，唔通佢怕步徐英偉後塵，擔心當眾被考起甩轆？陳百里就話唔係，事關佢喺上屆同時任特首辦主任嘅邱騰華接觸有限，邱上任局長後佢先發覺對方十分熟書，所以佢亦唔敢怠慢，經常「溫書」，以免被考起喎。
至於馮海容，陳百里坦言之前唔識對方，但認為佢來自民主思路嘅背景，相較於邱騰華嘅公務員背景同埋佢自己嘅政黨背景，有助喺局內分工。陳百里又話，希望未來可繼續負責游說立法會議員嘅工作，又指計劃聯同馮海容同議員助理多啲溝通，因為唔少議員向政府提交嘅問題都由議助撰寫。睇嚟佢做咗五年政助嘅歷練都冇白費到喎。
卓妮