中環出更：聽到「KOL」黃家和以為係OL
年輕人手機不離手咁上網，品牌行銷同KOL（意見領袖）、網絡紅人合作推廣產品已經成為新趨勢。早前卓妮喺香港化妝品KOL大賽頒獎禮上，見到香港品牌發展局主席黃家和（Simon），佢話自己原本唔知乜嘢係KOL，仲問同事係唔係有啲乜嘢特別嘅OL（辦公室女郎），後來同事解釋咗先知喎！
本身從事飲食生意嘅Simon話，公司有專門負責社交媒體嘅部門，佢哋同好多KOL都有合作。之不過佢第一次聽到呢三個字，唔知咩意思啫。後來經同事講解，佢仲學識咗唔少網絡潮語，如「AdWords（廣告關鍵字）」等。
何紹忠話KOL行業唔易做
同場仲有香港化妝品同業協會會長何紹忠、立法會批發及零售界議員邵家輝、香港市務學會榮譽主席陳裕光都有出席。同樣做飲食生意嘅陳裕光話，十年前已聽過KOL呢個名詞，意見領袖原本係指影響社會輿論嘅人，用於政治層面較多。不過佢就覺得用KOL幫品牌推廣，都要個KOL同自己品牌合襯先得。至於化妝品當然要搵靚仔靚女，但佢做快餐店，就會想搵貼地啲、經常食快餐嘅KOL咁話。
何紹忠都話，近年雖然唔少年輕人有意投身KOL行業，但其實一啲都唔易做。見佢哋拍片好似製作公司拍嘅咁靚，其實都係自己一手一腳做。佢又話，KOL要有創意，條片頭十秒就要吸引人繼續睇落去，訊息表達要好清晰，如果成功吸引好多追隨者，就可以成為一門生意喇。
卓妮