未入正題前，先同大家講個「馬桶理論」，意思即係馬桶冚埋個蓋，睇落好似蓋好乾淨，其實入面藏污納垢，一旦打開咯喎，即刻臭味四溢，中人欲嘔，呢，用嚟形容反對派就貼切不過嘞。
嗱，眼下又有一個現成例子喇。話說工黨主席胡穗珊尋日失驚無神宣布辭任黨主席兼退黨，嚇咗外界一跳，玩到咁大，並唔係佢有咩好路數，而係睇唔過眼黨內「有人處事及對自己不公」，認為黨內架構已無法公平公正處理黨務，不斷做出令佢無法接受嘅決定，屢勸無效之後，決定退黨抗議喎，黨內有幾多是非，家陣睇到喇。
即係咁，胡穗珊兩年前先至接過熱火棒，頂替黑金醜聞纏身嘅李卓人出任工黨主席一職，去年參選立法會地區選舉，諗住上位有望，點知黨內選情告急，但奇怪嘅係，佢哋唔係棄卒保帥，而係「棄帥保卒」，為咗集中資源畀李卓人、何秀蘭參選，胡主席「主動」退選。最惡頂係，胡主席犧牲咁大，得唔到尊重不特止，仲反而畀人逼走。好嘞，雖然胡女士好厚道，冇指名道姓批評「有人」即係邊個，但點講都好，胡女士作出咁嚴重嘅指控，證明工黨內部烏煙瘴氣，前主席李卓人難辭其咎。
係人都知，李卓人雖然已經被選民唾棄，但一直不甘寂寞，退而不休，喺反中亂港嘅大業上從不缺席。淨係講最近「雙學三子」鋃鐺入獄呢筆吖，法庭都仲未有判決結果啫，佢已經急不及待喺社交網站貼出美國國會議員嘅威嚇聲明，自揭勾結外部勢力、狐假虎威向港府施壓嘅底牌。仲有喎，前陣子白鴿黨鬧出「強力部門」擄人鬧劇，佢老哥明明唔係白鴿黨員，一樣大模廝樣傍實主角出場，慌死冇人知佢有份玩抹黑咁款。你話嘞，有人使橫手架空主席扮太上皇，真係一啲都唔出奇o架，唔想做傀儡咯喎，咪惟有出走一途囉。
再講吖，李卓人係咩料子，市民早就一清二楚，唔止牽涉壹淫媒老闆漢奸黎嘅政治黑金「袋住先」醜聞，佢隸屬嘅職工盟亦被踢爆收受美國國務院轄下嘅美國國家民主基金會等非政府組織最少過千萬元資助，每次行動事前申請，事後匯報，話佢係洋走狗就係咁解。呢嗱，收錢策劃佔中，咪就係外部勢力對佢落嘅其中一單柯打囉。
講起就諷刺，工黨以「民主、公義、團結」做口號，其實最唔民主最唔公義最唔團結就係佢哋，逼走主席只係內部傾軋，唯恐天下不亂、搞衰香港先至最大鑊，不過家陣法律大網愈收愈緊，一眾洋奴漢奸落鑊爭在遲早嘅咋。照咁講，胡女士辭職退黨，劃清界線，確係明智之舉！