政情：八網難逃：同鄧家彪食飯 容海恩話唔係「破冰」
新民黨立法會議員容海恩（Eunice）舊年當選立法會議員冇耐，接受傳媒訪問時暗示工聯會選舉落敗嘅原因係老土，即惹嚟當時同樣出戰新界東但落敗嘅工聯會鄧家彪（阿彪）一度喺社交網站反擊。事隔近一年，Eunice喺社交網站上載咗一張佢前晚同新民黨政策總裁袁彌昌、阿彪一齊食日本菜嘅合照，莫非今次係Eunice同阿彪嘅破冰飯局？
係有偈傾嘅朋友
仲記得Eunice當時指工聯會喺立法會選舉中落敗，係因為未能迎合社會潮流、與時並進，暗示工聯會老土，而阿彪就喺社交網站反擊，指老土係傳統文化，散發着智慧，雙方幾有火藥味。
對於今次同枱食飯，Eunice解釋唔係乜嘢「破冰」，兩黨一直都有合作，特別係近期經常合作處理水泉澳邨嘅問題，兩人亦經常喺唔同活動碰面，算係有偈傾嘅朋友。不過Eunice亦承認今次的確係佢哋第一次私下食飯，而且係由袁彌昌建議。餐飯最後由Eunice埋單，唔知Eunice請客係咪想為之前一時失言賠罪呢？