政情：張建宗上廣州黃錦星過半日「司長癮」

環境局局長黃錦星聽日首次「升呢」署理政務司司長！港府公布政務司司長張建宗聽日前赴廣州，為港府駐粵經濟貿易辦事處主辦香港回歸二十周年成就展開幕，並出席相關晚宴，期間亦會考察南沙，了解該區發展規劃，黃錦星喺張建宗離港期間署任司長職務。

不過，由於張建宗聽晚將會返港，換言之，喺新政府問責局長中資歷最深嘅黃錦星首次署任司長只有大半日時間。眾所周知，張建宗出名「標準長工時」同唔放假，今次適逢外訪先有署任安排，唔知黃錦星下次幾時先可以再過「司長癮」呢？

此外，民政事務局局長劉江華聽日離港，先後訪問日本京都同內地天津，期間會出席中日韓文化部長會議，直至下周二下午先啟程返港，期間預料由新任民政事務局副局長陳積志署任局長職務。