政情：莫乃光談創科 踩楊偉雄一腳

訪台交流 更見港創科乏善可陳

莫乃光近日上載相片到Facebook，透露到訪台灣立法院見老朋友國民黨立法委員許毓仁，而對方當日仲同科技業界朋友傾緊點支持共享經濟、修改過時法律等工作。莫乃光就指出，港台兩地喺呢啲範疇上有唔少相近之處，就係對共享經濟唔友善，落實電子支付都乏善可陳，而且政府同樣向既得利益者傾斜喎。

不過，佢就話港台分別在於制度上，因為台灣嘅在野黨立委提出嘅建議可以得到行政部門嘅回應，但香港就因為唔民主而寸步難行，所以就覺得港台兩地未來可以喺民主同創科上有更多合作咁話。

Uber爭議不絕 電子支付遠遜內地

其實楊偉雄上任兩年幾成績欠奉，其中Uber爭議就遲遲未解決，連佢本人都多番批評Uber係挑戰本港法治。而創科局嘅Facebook專頁更喺六月發文批評Uber以共享經濟為名「知法犯法」，直指Uber經過幾次警方拘捕行動都無作檢討，令到電召司機因違法取酬載客而被捕，力斥Uber唔負責任只為商業利益，搞到外界質疑局方同楊偉雄唔支持創新囉！

政府話要將香港發展為智慧城市，需要涵蓋生活、經濟同交通等等，係咪淨係加多啲Wi-Fi就可以增強競爭力呢？又例如外界批評香港遠遠落後於內地嘅電子支付，更加係遲遲未見影，所以話創科局真係大把嘢要做。

莫乃光今次明顯係借去台灣取經，乘機批評香港創新科技落後，暗批楊偉雄推動創科不力，睇嚟楊偉雄真係要急起直追先掂喇！