中環出更：颱風兇猛 沈運龍屋企洗手間海嘯
香港尋日懸掛五年來首個十號風球，風力之勁近年罕見，一度令香港海陸空交通陷入癱瘓，就算喺屋企亦可能有損失。中華廠商聯合會常務會董沈運龍喺社交網站自爆，尋日屋企洗手間「海嘯」，即係坐廁內嘅水都搖動到濺咗啲出嚟，估計同自己住四十幾樓有關，佢又對喺露台擺放多年嘅一對大象雕刻被吹爛，感到有啲可惜。
唔少政商界人士都經歷過香港多次打風，沈運龍話今次打風令佢回想起六十年代嘅颱風溫黛襲港，當時佢住喺深水埗唐樓，眼見對面山邊木屋有好多屋頂被吹走，自己親眼目睹都覺得好驚險，佢回想呢啲往事，覺得當年徙置區同廉租屋幫到好多人，認為有呢啲臨時居所，好過依家部分人要入住劏房。
施榮懷改搭高鐵 免滯留內地
另一方面，多名政商界人士知悉今次打風來勢洶洶，因此都早有準備，其中廠商會永遠名譽會長施榮懷原定尋日由內地搭飛機返港，但由於一早預計今次打風或影響航班升降，因此改為預訂由鄭州去深圳嘅高鐵車票，最終佢憑呢張高鐵車票，唔使滯留內地，少於七小時就抵達深圳。佢又趁機力撐廣深港高鐵香港段落實一地兩檢，令香港可以接通內地高鐵網絡，真係識搵機會宣傳高鐵嘅效用嘞！
身為港區全國人大代表嘅立法會議員田北辰，由內地返港嘅過程亦一波三折，佢原本打算搭飛機去深圳，其後諗住直飛香港等方案，都因為今次打風受到影響，最終都係改搭內地高鐵，事關坐高鐵真係好方便又準時喎。
至於早前到粵港澳大灣區內多個城市考察嘅沙田區議員龐愛蘭，原先打算尋日下晝返港，佢知悉打風後前晚漏夜搭穿梭巴士順利回港，完全無影響到之後嘅工作安排。
卓妮