政情：鐘錶業低迷 梁青華「上樓」儲能量
香港零售業嚴冬似乎已過，但珠寶鐘錶業仍未復甦。香港鐘表業總會前主席梁青華（華哥）話，雖然內地遊客已重返香江，但係買氣同幾年前冇得比，原因之一係香港奢侈品嘅定價仍然貴過歐美近兩成。咦？早兩年香港鐘錶業界咪已經成功向國際品牌爭取，將定價同歐美市場拉近咗咩？
華哥揭開謎團，話香港啲名錶確實已經減價，但係同一品牌嘅其他類別奢侈品，例如珠寶、手袋等價格不變，歐美仍低過香港近兩成。所以內地遊客如果想掃名牌貨，梗去歐美而唔嚟香港喇！原來係咁，唔怪得整體旅遊業好似見到曙光，但係珠寶鐘錶業仲係愁眉不展喇！
咁預計幾時先可以由谷底爬升呢？華哥就話有排等，相信未來五年都唔使諗。為咗保留實力等個市好番，最近佢就趁租約到期借勢結束零售業務，將生意搬番寫字樓做，話要慢慢儲番啲能量咁話。