中環出更：吳永嘉着得童裝加大碼

工業界立法會議員吳永嘉（Jimmy）經常打羽毛球，有運動嘅佢身形可以話係fit到漏油。Jimmy仲自爆話自己同太太都可以着到童裝衫，如果喺美國買衫，佢就可以揀童裝加大碼，而同樣纖瘦苗條嘅太太就可以着美國十二歲童裝中碼。佢仲話外國買童裝衫比成人衫價錢平一半，所以可以慳番唔少錢喎。

Jimmy之前同太太去夏威夷旅行，咁同太太有冇乘機去掃童裝衫呢？點知Jimmy就話冇掃貨，因為嫌美國時裝啲設計老土，唔啱佢哋心水。不過，因為Jimmy同太太係搭飛機經東京去夏威夷，佢哋回程時太太就喺東京「掃貨」，買咗唔少衫。佢話太太比較鍾意東京時裝，日本服裝尺碼偏細，所以比較啱太太。

另外，佢哋喺東京仲去咗今年四月先開張嘅銀座新地標商場。Jimmy話當地好耐都冇新商場，所以開幕時好多人排隊，好彩佢同太太係平日去，加上可能隔咗幾個月，唔使排隊就可以直入喇，佢哋仲喺商場一間餐廳大歎燒肉添！

卓妮