中環出更：唔信「八月危機」張德熙棄金買股
早前喺香港金銀首飾工商總會（總會）六十八周年就職晚宴上，遇到金銀業貿易場理事長張德熙（Haywood），講起近期北韓揚言向美國屬地關島開戰，掀起所謂「八月危機」，唔知一向被視為資金避難所嘅黃金係咪買得過？Haywood就話預計呢場仗打唔成，與其買黃金不如吼住股票市場調整，然後趁低吸納好過。
Haywood話北韓同美國最高領導人嘅脾氣比較火爆，兩人只係口頭上「鬥嘴」啫，相信擦出火花的機會不大。雖然早排黃金曾經一度上升，但係呢幾日已經慢慢回落，故此相信金價唔會因為呢一輪地緣政治緊張而飆升。
簡健光睇好一帶一路商機
總會永遠榮譽會長黃達華、理事會主席林銓同總會會長簡健光等人都有到場，佢哋都大力贊助支持今次活動，希望凝聚業界嘅力量，促進業界嘅可持續發展。黃達華仲特別感謝晚宴籌委會主席施清咸，形容籌備工作辛苦過娶新抱喎，真係識講笑。
講到經濟不景，簡健光話自己心目中冇所謂困境，只要諗辦法就一定有機會。佢就睇好一帶一路帶來嘅商機，打算去開拓緬甸周邊嘅亞洲國家，形容新興市場嘅人購買力比起成熟市場「買得狠啲」。
採取行動開拓一帶一路商機嘅仲有香港鐘錶業總會前副主席徐珊雯（Elise），佢哋啱啱去完土耳其返嚟，打算喺當地成立據點開拓腕錶生意。Elise話雖然土耳其政局欠穩，但佢十分睇好當地連接東歐同中東嘅地理優勢。
卓妮