大批市民搶購食材 「儲糧」

在九龍城街市，李太知道即將打風，昨帶同手拉車落街市買定幾日餸菜。她透露，除害怕天氣惡劣不便外出，亦怕打風後餸菜漲價。胡小姐昨亦特意到街市「買咗兩轉」，她坦言擔心「天鴿」威力大，會關好門窗。譚先生則稱，他擔心天氣惡劣，無得出街，所以買定食材準備與太太打邊爐。

街市海鮮檔減價促銷

據雞販玲姐說：「好多客仔叻過我，提我打風。」她指顧客都比平時提早光顧，下午四時許已經賣了半數雞隻。

菜販陳太也稱，顧客明顯多了，但她無預先入多一些貨，菜價亦與平時一樣，例如菜心及白菜都賣十二元一斤，她直言希望今日打風不用開檔，比起多做生意，她更想趁機會休息一下。

在灣仔街市及鵝頸街市，有海鮮檔減價促銷，亦有菜檔近乎被搶購一空。陳女士買了南瓜、其他菜和水果，準備應付颱風，她說，家中有不少罐頭，不擔心「無嘢食」。劉先生應母親要求到鵝頸街市買餸，主要買蔬菜，因即使打風，超級市場仍有乾糧可買，但新鮮蔬菜較少，而家中儲有凍肉和罐頭，能應付今天食糧。

超市凍肉櫃幾被清空

荃灣一間超級市場亦人頭湧湧，雖然付款櫃位全開，但仍大排長龍，有二、三十人排隊。該超級市場內大部分食品均已售罄，豬肉凍櫃幾乎被清空，壽司亦只剩餘數盒，生果、蔬菜則較多存貨。