誤人子弟枉為師 唔該港大清門戶

正如有立法會議員話齋，戴妖平時開口埋口教導學生以法律精神理念為重，但行為及言論「講一套，做一套」，特別係宣揚所謂「公民抗命」，教唆學生違法，同法治精神南轅北轍，已經冇資格再喺港大執教鞭，會就此去信港大，力求將戴妖拉下咁話。話時話，連日嚟唔少市民同團體殺上港大示威要求「斬妖」，呢啲咪過街老鼠囉！

要求「斬妖」嘅，又點止市民同埋議員吖，高院上訴庭改判雙學三子即時入獄，法官判詞直斥社會近年瀰漫一股歪風，某啲「有識之士」鼓吹「違法達義」，將公然蔑視法律視為光榮及自豪嘅行為，雖然冇點名，但好明顯講緊戴妖，點知佢老哥夠膽做唔夠膽認，一味死撐自己冇任意叫人違法，又話責任唔喺任何一個人身上，而係所有堅持「真普選」嘅人，甚至冇參與佔中嘅「都有責任」。「士大夫之無恥，是謂國恥」，形容嘅正正係呢挺學棍。

前大律師公會主席石永泰就講得啱嘞，戴耀廷既然已經落力搞佔中，冇可能繼續以學者身份剖析公民抗命；佢又點名批評戴妖「創意演繹」公民抗命，對於佔中及隨後發生嘅好多事，要負上好大責任。冇錯嘞，冤有頭，債有主，家陣參與暴力抗爭嘅年輕人爭民主嘅光環冇得戴，反而囚衣就有得着，前途盡毀，呢條數唔問戴妖追問邊個追？

呢嗱，咪睇戴妖平時將「違法達義」、「公民抗命」講到無比偉大，但輪到自己仔女即刻變臉，話唔容許佢哋參與佔中等違法行動喎。當自己子弟係寶，愛錫有加；當人哋子弟係草，推上前線當炮灰，雙重標準，龍門任搬，莫講話大學教書，為人師表，連基本人格都欠奉！

即使撇開政治唔講，戴妖嘅法律學者身份係咪夠料，亦大有疑問。佢引用英國終院○六年一宗案例，聲稱公民抗命係文明標記，有悠久及光榮的歷史，點知轉個頭畀港大校友踢爆佢唔止斷章取義，更隱瞞上訴嘅抗命者最終被駁回呢一筆，如果唔係刻意誤導，就肯定係學藝不精，濫竽充數。

一句到尾，多行不義必自斃。唔少年輕人因為輕信及衝動而付出慘重代價，冇理由坐視教唆犯繼續逍遙法外。戴妖自己知自己事，話預咗成為階下囚，更即場試着囚衣，對住呢條「準監躉」，港大清除瘀血毋須手軟！