政情：賴嘉汶做足筆記學講波

足球迷嘅周末又開始變得忙碌，事關新球季已喺八月開鑼，相信唔少女性朋友都要習慣吓男朋友掛住睇波嘅日子喇！民建聯小花賴嘉汶（Apple）最近就惡補足球知識，就係為咗幫一班姐妹學睇波陪男友。

Apple近期同屯門嘅手足一齊經營咗個Facebook專頁，希望以輕鬆手法接觸群眾。而佢哋就趁新球季開鑼同觀眾大講英超，除咗會分析球賽，亦會推薦重點球賽畀大家，Apple暫時就負責報道球賽結果，仲着埋波衫上鏡，真係唔打得都睇得吓喇！

不過，其實Apple從來都唔睇足球，直言唔知英超有廿支球隊同有成三百幾場波，但佢就好認真對待拍片，事關佢做足筆記希望先學習基本足球知識，好似球隊嘅花名、越位準則等等。而未來更可能會拍啲有關足球知識嘅短片，希望以淺易嘅方式教導女性朋友，令到佢哋可以同男朋友一齊睇波咁話。

話時話，Apple話曼聯係佢男友嘅愛隊，而佢上鏡所着嘅係唔啱身嘅曼聯波衫，唔通就係着咗男友件衫？