政情：囝囝美國留學楊偉雄靠電郵溝通

有時差 即時通訊唔合適

創新及科技局局長楊偉雄幫香港推動創新科技，相信大家都認為佢同喺美國讀書嘅兒子一定經常視像通話，原來主要用電郵同阿仔溝通咋！

楊偉雄早前出席一個活動時話，佢同阿仔有時都會視像通話，但係香港同美國有時差，所以主要都係用電郵溝通，即時通訊程式未必適合，電郵反而可以傾得多啲。咁阿仔係咪乜都同佢傾，有冇話佢知拍拖未呢？佢就哈哈大笑，叫我哋親自問佢個仔喎。

上次見係舊年聖誕

佢仲話阿仔今個暑假學校要上堂，所以唔可以嚟香港，佢太太就會飛去探下阿仔，而佢自己就因為太忙，無法飛過去，對上一次見個仔已經係舊年聖誕節嘞！咁聽落，佢肯定好掛住個仔喇！