中環出更：華慧娜教禮儀握手要有力
學識社交禮儀好重要，但依家年輕人對得電子產品多，社交能力都差啲。香港專業及資深行政人員協會（專資會）即將帶廿位香港青年去挑戰比利時毅行活動，早前舉行授旗儀式時，專資會副會長張華強話，今次出發前特別邀請咗專資會理事華慧娜（Vera）教授各種禮儀，所以班女學生都識擺S形姿勢喎。
毅行係要日以繼夜行山，點解要學社交禮儀？原來今次出訪比利時長達一星期，行山只係行一日半，但就有好多交流活動，所以要特別惡補儀態課程。Vera當年創辦香港第一間美容儀態學校，教禮儀自然得心應手。問佢有乜嘢貼士畀香港女仔？佢話最緊要有禮貌、謙虛兼笑臉迎人，仲有握手要真誠、有力，唔好求祈掂吓就算。
姚潔凝力薦行龍脊
兩年前參加區議會選舉失利嘅專資會成員姚潔凝都會帶學生一齊行，佢好鍾意行山，後生時即一路考金章，今次去比利時挑戰毅行，預計會輕鬆啲，因為香港山路多，上上落落比較消耗體力，比利時毅行路線就比較平緩易行。
講起香港嘅行山路線，姚潔凝極力推介龍脊，形容係香港最靚、最出名嘅路線，因為可以飽覽石澳同成個赤柱，有山有水，風景靚絕，最重要係難度唔高。
香港工業總會前主席鍾志平同專資會理事楊素珊都有到場，鍾志平自爆係今次年紀最大嘅團員。楊素珊就純粹嚟打氣，笑稱自己唔做運動。不過見佢身形苗條，唔做運動又點保持到呢？佢笑笑口話靠畫畫，因為畫畫都要用力喎。
卓妮