政情：顏吳餘英矯視後繼續戴眼鏡
唔少女強人都有一個特別鮮明嘅形象，其他人一睇到就會認得，好似喺工業界入面難得一見嘅傑出女工業家顏吳餘英咁，通常離遠就已經見到佢戴住顏色鮮艷嘅眼鏡，零舍醒神。不過，原來佢早前做咗激光矯視，依家正常係可以唔使戴眼鏡，但佢戴耐咗覺得唔戴反而唔習慣，所以後來就買咗啲平光鏡嚟戴嘞！
平光鏡太陽眼鏡各超過廿副
顏太話以前佢啲眼鏡真係有度數嘅，早年佢做咗激光矯視之後，其實可以唔戴眼鏡都睇到嘢，但佢覺得唔戴怪怪哋咁，所以就繼續戴。依家佢屋企有一格櫃係專放眼鏡，方便朝早襯衫時一打開就睇到，平光鏡同太陽眼鏡計計埋埋都各有二、三十副o架！
最近換咗副新眼鏡嘅仲有香港各界婦女聯合協進會（婦協）永遠名譽主席林貝聿嘉，呢日婦協舉行粵劇活動佢當然有出席，講起今次揀咗《花木蘭》呢套劇目，林貝聿嘉就認為可以代表女士喺社會地位上嘅轉變，所以對佢哋婦協嚟講亦別具意義喎。