中環出更：陸頌雄唔惹蚊 落區無有怕
近期香港蚊患嚴重，其中天水圍區更接連有患者感染經蚊隻傳播嘅日本腦炎。身兼元朗區議員嘅立法會議員陸頌雄（Michael），佢嘅選區同屋企同樣喺天水圍，佢話今年對蚊患感受特別深，因為其中一名患者係佢助理嘅家人。
話天水圍蚊患嚴重咗
Michael話同不幸中招嘅患者已經相識多年，由於佢喺隔離病房接受治療，所以就冇去醫院探望，但已經一早打電話去慰問咁話。佢又話最近接觸街坊，都有唔少人反映蚊患嚴重咗，佢就認為天水圍附近有豬場又多雀鳥，所以比其他地區特別有需要滅蚊，而佢亦已經要求咗食環署同房署加強滅蚊喇！
其實近期Michael多次現身出事地區，佢就話地區工作唔會受到影響，而且佢個人唔惹蚊，所以落區時都唔太擔心會中招，仲講笑話以佢作為蚊患指標一定反映唔到實況添！
卓妮