中環出更：周伯展家中論政甚少分歧
眼科醫生周伯展早前出新書，佢兩個女、女婿同自己診所姑娘都好支持，仲親自出埋嚟幫手。不過，今次周伯展出嗰本書叫《眼醫看香港》，見到書名都應該知道佢唔係講睇症趣事，而係討論香港議題，仲話平時喺屋企都會同家人討論時事。
通常子女嘅興趣同職業都好受父母影響，周伯展就話兩個女雖然冇跟佢一樣做醫生，但大女周廷勵係大律師，細女周宮慧則係事務律師，所以都非常關心社會。周伯展仲話慶幸佢同家人政見相近，所以就算喺屋企討論政事，都未試過出現嚴重意見分歧喎。
高永文輕鬆咗 準備開診所
阿爸做眼科醫生，會唔會對阿女眼睛健康特別嚴謹，督促住佢睇書或睇電話嘅距離？周廷勵就話冇喎，當然佢都冇試過匿喺被竇睇書睇手機，但就呻佢嘅近視係遺傳嘅，笑言做護眼操都無法避免。
呢日出席撐場嘅仲有食物及衞生局前局長高永文同人稱「史泰龍」嘅粵劇界布景畫部師傅兼復康力量董事仇健明。高永文離開「熱廚房」個幾月，應該輕鬆好多喇！佢話仲係好忙o架，但都算輕鬆咗，事關每日可以瞓多一個鐘頭囉！佢仲忙緊重開診所嘅事，由於要幾個禮拜時間準備，期間佢會先飛幾轉忙公司嘢同去旅行。
仇健明分享染菌截肢經歷
至於仇健明就喺現場分享咗自己當年因感染食肉菌而要切去雙腳嘅經歷，在場人士都為之動容。
卓妮