政情：網民惡搞「9413」菜單 諷刺林子健事件
民主黨成員林子健早前聲稱被擄走禁錮虐打，事件峰迴路轉，林子健依家由原告變成被告，被控誤導警務人員罪，令民主黨支持度大跌。有網民就事件惡搞，以語帶雙關整咗一張酒席菜單，間酒樓叫做「西貢虛幻沙灘海鮮酒家」，酒席名堂為「銀主黨解穢酒」，菜單上隱約見到林子健張相，主菜中有一道叫「豬狗一鑊熟」，勁搞笑。
呢圍酒席全包價為港幣九千四百一十三元，意指「九死一生」。每圍分成主菜、三熱葷、河鮮飛禽、合時甜品同埋美點雙輝。當中熱葷有「田雞跣過河」，河鮮有「白鱔上沙灘」，甜品就有「杰過芝麻糊」、「街坊笑口棗」等。唔少菜式係藉林子健嘅外貌、民主黨嘅標誌諷刺今次事件。
叫出席者自備口罩釘書機
菜單上仲有備註提醒出席者自備鴨嘴帽、口罩以及釘書機等道具，菜單上載社交網站後，有網民留言讚好，亦有人話要「預訂一圍畀民主黨」喎。