政情：港島出缺眾志無大將泛民（目及）住搶？

周庭無意出選 黨內難搵人

黃之鋒一直希望參選眾所周知，據了解，羅冠聰早前被取消議員資格之後，眾志原本有兩個計劃，一係由羅冠聰自己披甲上陣出戰港島區補選，若然中間出現阻滯，就由即將滿廿一歲、夠秤參選嘅黃之鋒頂上。當時主流民主派普遍有共識，認為由眾志派人重奪議席係應有之義，有默契唔會派人去爭。

估唔到，三人齊齊入獄令事情出現突變，由於眾志方面較有知名度嘅成員一係有案在身，一係好似黃之鋒、羅冠聰咁，已經喺獄中服刑，而較為人熟知嘅周庭亦都因為家庭問題抗拒出選，要喺黨內搵人參與港島補選有一定難度。正如周庭前日所講，佢哋因為案件纏身，就參選已經無太多討論，佢哋或者會以議席以外其他方式去服務社會，照咁睇，眾志參選機會的確好細。

港島區補選喺單議席單票制嘅情況下，由民主派勝出嘅機會好大，如果眾志放棄，有民主派中人對議席虎視眈眈亦不足為奇。

何秀蘭近日表現積極惹關注

有民主派中人分析，其中一個對議席有興趣嘅，相信係今屆立法會選舉喺港島區連任失敗嘅前議員何秀蘭。有指何秀蘭近日表現積極，除咗協助網上專頁「法夢」支援被判入獄嘅社運人士之外，更加喺法庭裁決時貼身陪伴周永康媽媽，舉動獲唔少人注意。另外亦有分析指，民主黨港島區乳鴿眾多，隨時派一個半個出來爭取多一席亦有可能。

民主派中人強調，目前仍然未有人表態參選，事關太快採取行動只會令同路人覺得「涼薄」，只為議席而唔理公義，最終適得其反。之不過，狐狸終歸會露出尾巴，究竟係人係鬼，相信好快揭盅。