中環出更：鄭泳舜鑽研電競 增選戰籌碼？
近年電競大熱，以「砌機」（組裝電腦）打響名堂嘅深水埗黃金電腦商場，唔少店舖都轉賣電競相關嘅鍵盤、滑鼠等硬件配套。大個仔之後好少打機嘅深水埗區議員鄭泳舜（Vincent），早前為咗了解電競特登去試玩，一玩先發覺電競市場龐大，仲話決定要好好鑽研咁話。其實電競相關政策無乜人去理，唔通盛傳出戰西九補選嘅Vincent，想藉住電競增加選戰籌碼？
屬新興項目 相關政策少
Vincent話，自從電競興起，黃金商場又再熱鬧起嚟，皆因電競講求電腦硬件水準，唔夠好打起嚟畫面唔順，要贏都難；而鍵盤、滑鼠等配件亦非常講究，呢啲配備全部都可以喺商場內搵到。
早前佢試玩之後，最驚訝係電競原來有旁述，旁述員語言同節奏十足講波咁，雖然佢唔識啲術語，但係都聽得好緊張。他認為電競發展潛力龐大，仲話會去慢慢鑽研添。電競呢個新興項目，相關政策少之又少，如果有人專門跟進，從選票角度嚟睇都有一定市場，唔知呢個會唔會係Vincent喺西九補選嘅策略呢？
卓妮