中環出更：越南三人行葛珮帆畀機械人打
立法會正值暑假休會，立法會議員葛珮帆（EQ）、容海恩（Eunice）同何君堯就乘機去越南胡志明市出席一個論壇，同亞洲及太平洋地區嘅議員、專家討論人口老化問題。EQ自爆參觀一個由日本主辦嘅專題展覽時，唔小心畀一個識唱歌嘅機械人打咗下巴一下，場面非常搞笑。
EQ話一連三日嘅活動令佢獲益不少，其中印象最深刻嘅係睇到由日本研發嘅護老機械人，呢個機械人唔止識同老人家傾偈，仲可以唱歌、跳舞，非常盞鬼。不過，EQ因為聽機械人唱歌太入神，竟然愈貼愈埋個機械人，最後畀正喺度載歌載舞嘅機械人打咗下巴一下，好在無破相咋！
容海恩覺得胡志明市先進咗
除咗參與研討會，佢哋三人仲兵分兩路去考察當地護老設施。其中EQ同何君堯就去咗參觀當地嘅跨世代互助中心，EQ話十分欣賞呢個互助中心嘅概念，因為佢哋鼓勵老人家自己搞活動，唔需要依賴社工或者後生仔幫手。佢仲話有同互助中心嘅老人家傾偈，感受到佢哋好開心，同住喺老人院好唔同。
至於Eunice就去咗胡志明市最大嘅醫院參觀，行程比去互助中心輕鬆。Eunice話參觀醫院之後，就一個人去咗行街，覺得胡志明市比自己十年前去嘅時候先進咗好多，佢仲行咗入一條日本街，食咗一餐好好味嘅法國菜。Eunice大嘆今次主要係公務訪問，無時間周圍睇吓，佢希望日後可以抽時間再去越南旅行喎。
卓妮