香港福地淪亂地 宜居排名跌不休

正所謂一葉落知天下秋，近年香港各方面都走下坡，十足十王小二過年咁，一年不如一年，何嘗唔係「今不如昔」？呢，尋日有國際機構公布二○一七年全球宜居城市指數，結果香港喺一百四十個城市中排名下跌兩級至第四十五位，跌出亞洲三甲；反觀老對手新加坡，排名較上次調查大幅躍升十一級，去到第三十五位，首次超越香港。

國際機構係咁講嘅，新加坡教育制度持續改善，係當地排名急升嘅原因之一；而香港除咗空氣污染問題之外，自佔領行動後社會內部出現矛盾，令居者安全感知下降，亦係失分主要原因。

講起香港教育真係一殼眼淚。以前殖民地時代填鴨式教育，一試定終身等問題備受詬病，點知回歸後港府教育改革愈搞愈令家長學生無所適從。淨係講學生語文水準，舊時啲精英英文一般都talk得下，家陣啲畢業生好多都英不成，中不就。本來呢，九七年後香港同內地聯繫日益緊密，港生有機會學好普通話，可惜喺教育政治化之下，連「普教中」都儼然成為政治不正確，咁就講乜都嘥氣喇。

冇錯喇，教育政治化正正係香港衰敗嘅癥結。古人話「師者，所以傳道、授業、解惑也」，香港唔少大學教授反其道而行，鼓勵學生有書唔讀走去搞街頭抗爭，難怪本港大學排名跌跌不休。師生不務正業，成個社會亦係內鬥內耗，政制發展、「一地兩檢」等政治議題固然嘈餐懵，連跑步可唔可以飲啤酒都有本事拗到反枱，唔到你唔服。冇錯，有人嘅地方就會有政治爭拗，新加坡第一家庭近排紛紛擾擾，一樣喺當地引發唔少爭議，但人哋市民該搵食就繼續搵食，唔似得香港咁，三日唔埋兩日示威遊行，煩都煩死人。

一個城市好唔好住，講到尾都係「安居樂業」四個大字啫。香港住屋問題唔使多講，年輕人欠缺上流機會更加令社會動盪不安。最慘係市民想食餐安樂茶飯都不可得，特別係南亞兵團肆虐社區，市民「安全感知」唔下降就假。至於調查所講嘅空氣污染問題，講咗N年都解決唔到，社會名副其實烏煙瘴氣，係人都想走喇！

香港福地淪亂地，宜居排名跌不休。近年香港移民潮再起，新加坡固然令人趨之若鶩，連瓦魯阿圖都有人吼。「香港幾好都有，點捨得走」嘅老好日子，唔通同經典流行金曲一樣，往事只能回味？