男人係咪真係好膚淺？咁就要睇吓喺乜嘢情況啦！如果有位身材玲瓏浮凸，兼且大方展露事業線嘅索女企喺面前時，試問有邊位巴打夠膽話自己一定唔會（目及）先？若然企喺面前係外號有「小魔女」之稱嘅南韓索模徐韓光嘅話，何止喪（目及），簡直會變身成人肉掃描器添呀！
出生於南韓首爾嘅徐韓光，真名叫李娜莉，據佢講之所以改呢個藝名，原因係希望可以成為南韓之光。理想咁宏大，佢又能否做到呢？事實上，喺佢決定成為全職模特兒前，早已有兼職模特兒嘅經驗，而當時佢就有計劃，希望以模特兒作為自己嘅事業。不過佢所考慮嘅並非可以喺呢行搵到幾多錢，而係點樣能夠成為一位具代表性嘅模特兒。經過同事務所洽談後，被對方嘅長遠計劃所打動，因此喺2012年正式投身模特兒界，並以賽車女郎身份於南韓電單車冠軍賽中登場，而呢次亦係佢成為職業模特兒後嘅首個演出。
可能有人會問，大部分初出道嘅模特兒都會先拍攝硬照累積經驗後，先會喺大型車展或賽事中亮相，一來為免佢哋怯場，二來等佢哋能以自信一面示人，點解徐韓光可以跳過呢一步呢？正如先前所講，佢早就已經有相當嘅模特兒經驗，故此可以直接喺大型場合登場。而呢次處女演出相當成功，憑住嬌媚嘅樣貌配合貼身又性感嘅賽車女郎制服成為全場嘅亮點之一，而一對修長美腿及胸前嘅深溝，更成為攝影師爭拍嘅焦點。冇幾耐，佢再次以賽車女郎身份喺釜山舉辦嘅國際賽車比賽中亮相，其後佢不但成為賽車隊伍專屬賽車女郎，更以車模身份先後喺首爾、大邱、釜山等多個大型國際車展中亮麗登場。
隨住佢喺賽車女郎界及車模界嘅人氣不斷提升，佢又以Show Girl身份喺多個電子產品展、電玩展等展銷活動上登場。不過作為一位人氣相當高嘅模特兒嚟講，佢嘅曝光機會又點止咁少呢？事實上，自佢喺賽場上誘人亮相後，亦開始攝影模特兒嘅工作，有粉絲曾經幫佢做過統計，幾乎每個星期都可以喺各類型嘅平面媒體上，見到佢最新嘅性感迷人照片。事業發展得咁順利，唔少人都認為阿妹全靠魔鬼級數嘅火辣身材，但係當大家細心留意嘅話，卻會發現佢最迷人嘅部位，係一雙電力十足嘅眼睛。擁有一對大眼睛嘅佢，散發出一股懾人魅力，更有種勾動人心嘅魔力，難怪得到「小魔女」嘅稱號。
如果大家以為徐韓光嘅魅力僅限於外在美嘅話，咁就大錯特錯，因為任憑一位外形有幾養眼嘅靚女，如果冇內涵嘅話，睇得多亦會令人生厭，而阿妹之所以能夠自2012年出道至今都咁受歡迎，肯定並非單憑外形就得。既然係咁，佢仲有乜嘢吸引人嘅地方呢？就係一顆孝順嘅心！雖然平日工作非常忙碌，但係佢一有時間就同父母去旅行，呢份孝心唔係每個靚女都擁有。此外，佢亦愛烹飪，經常喺社交網分享自製美食，如此入得廚房出得大堂嘅索模，試問點可以唔叫佢一聲女神呀！
簡介：唔少人都會用魔鬼身材嚟形容徐韓光，外在美十分吸引，其實阿妹亦有着內在美，否則單憑外形嘅話，又點可以紅足咁多年，得到咁多粉絲支持呢？如果大家想了解佢多啲，就要Click入呢個網喇！
網址：http://cafe.daum.net/hanbit-seo
出生地：首爾
身高：170cm
三圍：34、23、34
撰文：魂