政情：嗜甜張智恆 獨愛冷壓果汁
為咗身體健康啲，好多人唔單止要多菜少肉甚至食多啲素，連飲杯嘢都話要少甜走甜。早前我哋見到菁英會理事張智恆（Angus），身形冇乜脂肪嘅佢原來都鍾意飲甜嘢，但就會盡量揀健康啲嘅冷壓果汁喎。
幾千蚊慢磨機打入冷宮
講到Keep Fit秘技，Angus話好多人都鍾意一早起身飲杯咖啡可以去水腫，但佢又唔係好鍾意，反而硬係想飲甜甜地嘅果汁，咁佢見早排網上好興教人自家製Detox Water（排毒水），所以咪走去試吓，不過貪過癮整咗一排，仲用咗幾千蚊買部慢磨機返屋企，玩咗一個月都冇就已經畀佢打咗入冷宮，擺埋一邊，因為太麻煩喇！
依家佢索性出街買現成嘢飲，但啲報道成日話甜嘢有幾多粒糖都咪話唔驚，健康啲揀五青汁嗰類，佢個胃口又唔爭氣，唔啱佢口味。
最後轉飲外國好興嘅冷壓果汁，話有時夜晚去完啲晚宴大魚大肉兼飲酒多，第日齋飲冷壓果汁當清腸胃，罪咎感低啲喎。