政情：張國鈞「自搜」乜都唔放過

除咗身兼中西區區議員嘅民建聯張國鈞係「三料議員」，立法會現時有六名行政、立法雙料議員，包括工聯會黃國健、新民黨葉劉淑儀等，佢哋齊齊喺七月一日開始出任行會成員，唔單止喺行會成員個人利益登記冊作出申報，原來多人同時更新立法會個人利益登記冊，除咗申報上月起出任行會成員，更順帶喺申報時進行「自我搜身」。

申報40職務 防利益衝突

其中身為律師嘅張國鈞更新立法會利益申報嘅動作最大，佢喺本月四日一口氣巨細無遺申報四十個團體嘅職務，較為人熟悉嘅有港大校董會校董、足球總會上訴委員會委員、發展局嘅社區參與綠化委員會非官方成員等，另外大批地區團體嘅名銜都一一羅列。

至於估唔到有關連嘅團體名銜，張國鈞亦都唔放過照申報，包括薇韻天地名譽主席、香港釣網漁民互助會名譽會長、香港漁民互助社名譽會長、港九新界販商社團聯合會榮譽會長等。翻查網上資料，薇韻天地喺地區組織舉辦舞蹈班等聯誼活動，後三者則同漁民或販商有關，真係唔講都唔知嘞！

與張國鈞同為新任行會成員嘅黃國健則申報番已發生嘅事，佢本周一（14日）喺有關受薪工作及職位一欄申報中，提及五月三十一日已終止出任保安及護衞業管理委員會委員。至於重返行會嘅葉劉淑儀喺本月七日申報，於七月十六日至二十三日訪問捷克布拉格同希臘，此行目的係推動一帶一路倡議，期間曾獲贊助機票同住宿，合共四萬多港元。

話時話，議員涉及金錢贊助要申報，而地區團體嘅名銜亦要羅列清楚，如果唔係事前有系統去「自我搜身」作出統計，真係隨時掛一漏萬o架！