中環出更：容海恩素顏直播 被笑「容斑斑」
網上直播成為宣傳主流，但稍一不慎隨時得不償失。好似正喺越南訪問嘅立法會議員容海恩，尋日探訪當地醫院時玩直播，點知素顏嘅佢太近鏡頭，被網民笑有雀斑同眼肚，更被戲稱為「容斑斑」。
網民指「眼肚何其深」
容海恩尋日參觀越南胡志明市一間醫院期間，用手機喺Facebook大玩直播，稱當地醫院無冷氣，又展示當地病人點樣輪候接受治療等。不過網友最關注嘅，卻係容海恩本人。皆因佢用手機自拍，鏡頭同面部好接近，片中多次見到佢嘅面「逼爆Mon」，兼且佢全程素顏，面上雀斑顯而易見。網民都忍唔住留言，提醒佢唔好太近鏡頭，有人更指佢「眼肚何其深」，又叫佢做「容斑斑」。
其實，佢喺舊年競逐立法會選舉時，已自爆容易有雀斑，更指雀斑同短髮一樣，係佢嘅特徵添！佢當時仲話自己會留意雀斑有冇加深迹象，點知今喺近鏡兼素顏下，雀斑盡現人前。
卓妮