中環出更：投杯球電子化趙朗撞出商機
創業好多時未必會一帆風順，與其他創業者多交流經驗有時會有意外驚喜。尋日係前海深港澳青年創新創業大賽香港區比賽得獎隊伍分享會，卓妮見到其中一間做投杯球（Beer Pong）電子化遊戲系統嘅得獎公司主席趙朗，佢兩次參加比賽都覺得同其他隊伍有合作空間，唔知算唔算意外收穫？
趙朗話投杯球喺外國係一項競賽運動，相當受歡迎，佢喺外國讀書時首次接觸，於是諗到研發有關電子化遊戲系統自動計分，嚟緊十一月更會舉辦投杯球比賽，希望投杯球可以發展到好似飛鏢咁樣。
而今次獲得初創企業組第一名嘅公司係做網紅生意，創辦人張焯然同關裕庭睇中女士喺電競行業嘅發展潛力，除結集同培養網紅與電競人才外，仲建立女子電競組合，身旁做投球杯嘅趙朗都覺得有合作空間。
前海管理局香港事務首席聯絡官洪為民就話，一群創業者聚集一齊有時有助互相啟發，比閉門造車好。佢又話香港創業氛圍好而且愈見成熟，少咗一啲「為創業而創業」嘅人。而作為評審之一，佢認為初創公司最忌係唔了解市場情況，只顧自己產品或意念有幾好而忽視甚至唔知道市場上有其他競爭者正生產或已推出類似嘅嘢。
洪為民：初創最忌向錢看
洪為民仲建議初創公司揀投資者時唔好只睇「錢」，應搵合適同埋熟悉該行業的投資者反而更事半功倍，而篩選投資者的過程中創業者容易因過度追求更高價錢而錯過最佳時機。另一評審、第一線創辦人及行政總裁文立就認為團隊相當重要，同洪為民嘅諗法接近，認為團隊「齊腳」同能夠互補不足好重要。
卓妮