政情：高偉國開餐廳 喺正公司樓下
香港多條港鐵延線陸續開通，帶動一啲舊區成為新蒲點。其中南港島線嘅黃竹坑就湧入唔少新食肆，連做鐘錶生意嘅香港表廠商會副會長高偉國（Tim）都趁熱鬧，喺該區開咗一間主打東南亞菜式嘅餐廳。咪以為阿Tim開餐廳係為咗自己醫肚或者招呼朋友，佢雄心壯志咁話要開連鎖店，打造現代版健康美食廣場喎。
區內港鐵通車帶來商機
阿Tim除咗幫爸爸高叔平打理家族鐘錶生意之外，自己亦有涉足私募基金、紅酒同健康產品等投資，呢間餐廳係佢投資嘅第二間食肆。佢話餐廳開正喺自家公司樓下，係因為區內最近多咗新辦公大樓落成，加上港鐵通車，好多中、西式食肆湧入，令佢聞到商機。