政情：沈運龍獻計林亮 鑽石鴨宣港精神
唔少小朋友洗澡時都會擺幾隻小黃鴨相伴，其實香港最早出現嘅塑膠小黃鴨係由有「變形金剛之父」稱號嘅林亮喺一九四八年創立。香港中華廠商聯合會常務會董沈運龍（Aaron）近日有新意念，建議林亮將小黃鴨打造為鑽石鴨，用嚟推動香港精神。
食住小黃鴨熱潮
Aaron早前同林亮、囝囝兼立法會議員林健鋒同埋孫兒林凱章三代同堂一齊開會，佢盛讚年過九十歲嘅林亮熱愛香港，力推香港精神，兼且搞「二次創業」亦搞得有聲有色，絕對唔係「講笑」。尤其近兩年小黃鴨再掀熱潮，Aaron於是建議打造鑽石鴨嚟推動香港精神。唔知林亮嘅意向係點呢？
打造鑽石鴨係咪忽發奇想？咁又未必，事關從事珠寶業嘅Aaron早於兩年前製造鑽石結他，更成功創造健力士世界紀綠，成為「世界之最」，係全球最高價值嘅結他，所以要將小黃鴨打造為鑽石鴨，對佢嚟講相信冇難度。