政情：山頂補選 楊哲安「臨危受命」
獲委任為財經事務及庫務局副局長嘅陳浩濂早前已辭任中西區山頂區議員一職，呢個席位即將安排補選。佢所屬嘅自由黨內曾出現多個可能會參與補選嘅人名，但有人表明對山頂區議員一職無興趣，據悉黨內有意重新推舉「翻叮」教育局前政治助理楊哲安。
為咗承接有關議席，據聞該黨曾考慮由楊哲安或前年參戰區選嘅吳龍飛出選，但黨內就考慮過吳龍飛出身基層，經常都將炒樓掛喺嘴邊，未必適合出選山頂，而黨內亦有人對楊哲安有微言，搞到該黨高層相當頭痕，擔心搵唔到合適人選。近日黨內又再有聲音，建議重新推舉楊哲安出選，並私下徵詢黨友意見。
黨內意見好壞參半
據聞黨內對推舉楊哲安嘅意見都係好壞參半，相信要等高層開會討論之後，先可以有最終決定。其實楊哲安喺一五年曾出選南區薄扶林選區，最終輸咗畀連任嘅司馬文，加上佢曾做過政助，外間盛傳佢一心只係想返政府工作，即使佢最終真係出選，好可能只係臨危受命而唔係心甘情願。