政情：梁美芬陳曼琪選人大睇高一線

法律界出身 多次積極「打大仗」

梁美芬係大律師，而陳曼琪就係律師，二人喺佔領行動期間都積極表態反佔中，並以二人嘅法律界背景，多次質疑相關人士違法，而陳曼琪喺佔領行動時，代表潮聯小巴申請佔旺禁制令，仲親自到旺角佔領區宣讀禁令內容。一六年發生旺角暴亂，二人亦多次批評事件嚴重衝擊香港法治，必須嚴懲有關人士，以至最近高鐵引發一地兩檢爭議，二人都加入「法律界關注一地兩檢聯席」，並發表多項聲明，表明一地兩檢方案符合《基本法》，係「合憲、合法、合理」。

梁美芬同陳曼琪喺多次重大事件上，都積極以佢哋嘅法律界背景去表達法律意見，外界估計，未來再面對法律爭議時，都需要有法律界人士去「打大仗」，再加上喺現任人大當中，多名女士已表明不競逐連任，所以喺年底嘅人大選舉上，梁美芬同陳曼琪較被睇好。

陳曼琪回覆查詢時，承認積極考慮參選，認為作為法律界有責任去盡一分力，希望維護《基本法》喺本港落實，至於自己喺反佔中同支持一地兩檢等事情上，只係做應該做嘅事，並非同人大選舉有關。

今屆泛民選票多 但未必佔優

此外，政圈流傳自由黨嘅立法會議員易志明有意參選，早前亦傳出多名青聯及菁英會背景嘅人士亦有意加入戰團，包括洪為民、吳傑莊等，另外有部分人士已經打退堂鼓。

有政界人士分析，雖然今屆泛民選票比較多，但未必足以令泛民參選者勝出，不過或者會拉到某啲人落選，令選舉部署因而受到影響，加上今屆政協數目減少，如果部分資深政協轉戰人大選舉，就可以降低風險，亦因此令年輕新面孔較難喺人大選舉中勝出。