中環出更：張曼莉做司儀畀楊偉雄「揀中」
口才好就可以入政府？邊個部門揀人咁破格，答案咪就係創新及科技局囉！創科局局長楊偉雄尋日同傳媒茶敍，話揀年僅廿八歲嘅張曼莉出任政治助理，原因係喺一次科技活動中認識佢，覺得當時擔任活動司儀嘅佢口才好，講嘢又有道理，覺得佢係人才，之後經過幾輪面試，就揀咗佢嘞！
楊偉雄仲話面試張曼莉嗰陣都唔知佢幾多歲，但佢覺得用人最重要係才能，唔係年紀。雖則話年齡係女士嘅秘密，但唔通張曼莉嘅履歷表無寫歲數？抑或係楊偉雄無留意呢？咁就不得而知啦！
創科局未為Uber議題定時間表
被問到張曼莉加入政府前為地產商打工，會唔會擔心處理河套區科技園發展時有利益衝突，楊偉雄就話唔好將兩件事混為一談，認為就算無河套區科技園，依家都有沙田區科技園，兩者嘅管理模式係一樣，唔會有利益衝突嘅問題。佢又話預料二○二一年會將第一幅河套區平整土地交畀科技園發展。
另外，被多次追問手機召車應用程式Uber非法取酬嘅問題幾時可以正式解決，楊偉雄話唔會為呢個議題定時間表，只係話會跨部門研究，佢都畀咗啲技術建議運輸及房屋局，但係咪要修例就應該由對方決定，又話法治係香港嘅核心價值，Uber嘅法律問題應該用法律方式解決。
卓妮