中環出更：馬清楠談賣旗倡復用金屬
保良局自三十年代已經開始賣旗籌款，當年係由賣花開始，五十年代就改為賣紙旗，如今賣旗就係大家常見嘅貼紙，方便市民貼喺身上，更曾一度推出「名譽旗」，畀恒常捐款人或機構放喺車頭，而名譽旗亦曾以金屬製作推出過。保良局副主席馬清楠話，自己最早接觸嘅旗就係金屬製作，可惜已經唔見咗，否則真係好有紀念價值o架！
馬清楠話可以考慮吓係咪再以金屬製作名譽旗，覺得物料唔成問題，反正依家都有好多月餅罐剩低，咁就可以循環再用，而且以金屬製作，又可以鼓勵大家保存。至於總理陳黎惠蓮就認為如果以金屬製作，要考慮成本，不過世代唔同，覺得依家嘅人唔一定好注重物料，反而設計特別，都會值得收藏，正如今年保良局推出五款以原創動漫人物「小保良」為設計嘅旗，而只要捐款三千八百元以上，就可以獲得特別版「名譽旗」，好似儲郵票咁，都好有收藏價值。
陳細潔同小學生齊設計紙旗
被問到有冇參與紙旗設計時，主席陳細潔就話：「我不嬲都多多意見，過去嘅旗太悶，但終於用晒啲舊旗，今年決定大創新，與時並進搵啲年輕人嘅創意，同小學生一齊參與好開心。」
聽日係保良局一年一度賣旗日，善款將全數用作安老服務，用嚟支援特殊教育學童等，今年除咗有五款「小保良」，仲喺旗上印有QR Code，市民用手機掃描就可以下載手機桌布。
總理林承毅就話自己第一次賣旗就係做童軍嗰陣，當時約五、六年級，都係夏天賣旗，好熱o架，啱啱開始賣嗰陣都有啲怕醜，但係賣多陣就唔驚嘞！佢仲教路話最好就係搵一對對男女賣旗，先問個男仔，再問女仔，咁就最易成功賣出去嘞！
卓妮